ILOILO CITY- Nagpaathag ang Executive Assistant for LGBTQ Affairs sang Iloilo City Government may kaangtanan sa naglapta nga sreenshot nga nakabutang nga indi makapakigbahin sa selebrasyon sang Pride Month ang sin-o man nga nagasuporta sa iban nga partido.
Sa amo nga screenshot, nabutang man nga ang Pride Fiesta parade ang sa idalom sang administrasyon sa pagpanguna ni Raisa Treñas kag Team Uswag kag ang nagasuporta sa lain nga partido ang indi welcome sa organisasyon.
Sa interview sang Bombo Radyo kay Gab Umadhay, iya ginpahayag nga wala gid nagpagwa ang iya opisina sang kaangay nga statement bangud halin sang una, bukas para sa tanan ang ila selebrasyon.
Suno sa iya, may yara lang sang mga tawo nga luyag gub-on ang ila opisina kag i-boycott ang ila kahiwatan.
Ang pagkamatuod, suno kay Umadhay, bukas man sila sa tanan nga mga indibidwal, ano man ang partido, kun luyag nila nga mag-sponsor para sa event.
