ILOILO – Magalab-ot lamang sa 50 kada batch sang mga na stranded nga Overseas Filipino Workers sa Metro Manila ang ipaidalom sa Polymerase Chain Reaction test antes makapauli sa Iloilo.
Sa interview sang Bombo Radyo kay Iloilo 4th District Board Member Rolando Distura, iya ginpahayag nga nadesisyunan sang Overseas Workers Welfare Administration nga tungaon sa 50 ang kada batch bangud sa logistical concern.
Suno kay Distura, ginaproblemahan sang Overseas Workers Welfare Administration kun paano matipon ang mga Overseas Filipino Workers nga nahamtang sa nagkalain-lain nga lugar sa Metro Manila.
Ginpahayag ni Distura nga kun makapaidalom na sa PCR test kag kun magnegatibo, mahimo na nga makapauli sa Iloilo ang mga stranded OFWs.
Pag-abot diri sa syudad sang Iloilo, liwat sila nga ipaidalom sa quarantine kag COVID-19 test kag kun magnegatibo, mahimo na sila nga makapauli sa ila tagsa ka balay.
Sa subong suno sa natungdan, ginahitso na kun sa diin magatinir ang mga OFWs kun sa diin may yara na sang ginabanta 4 tubtub 5 ka hotel ang nagpasugot nga magtanyag sang accommodation.
