PASSI CITY – Nagpanugyan si Passi City Mayor Stephen Palmares nga kuntani ang mga pantalan kag paluparan lang ang siraduhan sa probinsya sang Iloilo.
Ini ang may kaangtanan sa Executive Order 128-C ni Iloilo Gov. Arthur Defensor Jr. sa diin ginadumili-an ang pagsulod sang mga tawo sa Iloilo halin sa iban nga probinsya pinaagi sa pagpahamtang sang border restrictions.
Sa interview sang Bombo Radyo kay Passi City Mayor Stephen Palmares, iya ginpahayag nga luyag kuntani niya nga may yara sang One Panay agud mag-alalangay ang desisyon sang tanan nga opisyales sa Western Visayas.
Suno kay Mayor Palmares madamo ang naapektuhan sang pagpasirado sang border control areas ilabi na ang mga taga Dumarao, Capiz nga nagasulod sa Passi City agud manindahan.
Subong, Hulyo 4, na eksperyensyahan man ang tuman nga pagpugok sang trapiko humalin sang aga tubtob sang hapon.
