Nagaamat-amat na balik sa normal ang operasyon sang mga transport cooperatives sa Iloilo City bangud sa serye sang rollback sa presyo sang diesel.
Sa interview sang Bombo Radyo kay Mr. Raymundo Parcon, chairperson sang Western Visayas Transport Cooperative, iya ginpahayag nga yara na subong sa 50% tubtob 70% na sang ila mga units ang nagabyahe sa nagkalain-lain nga ruta sa syudad.
Suno kay Parcon, doble ini gikan sa 30% sang mga units nga ila ginpabyahe sang nagligad nga bulan bangud sa pagtimbuok gid sang presyo sang gatong tuga sang giyera sa Middle East.
Gin-ako naman ni Parcon nga bangud sa naangkon nila nga kapierdehan sa kita kun sa diin halos wala sila sang ginansya, wala sila makabayad sa sulod sang duha ka bulan saang ila amortization sa ila gin-loan para makabakal sang modernized jeepneys.
Nagalaum si Parcon nga mangin tayuyon ini nga positibo nga development agud makabalik na sa dalanon ang 100% sang ila units agud nga makabawi-bawi sa ila kita kag mabayaran ang mga utang sang kooperatiba.
