ILOILO– Nagpagwa ang Mines and Geosciences Bureau-Department of Environment and Natural Resources Region VI sang updated nga listahan sang mga banwa nga delikado sa baha kag landslide kun maglaslas ang Bagyo Auring.
Yari ang mga banwa kag numero sang posible maapektuhan nga mga barangay:
Ajuy – 26 barangays
Balasan – 22 barangays
Barotac Viejo – 5 barangays
Batad- 24 barangays
Carles – 31 barangays
Concepcion – 24 barangays
Estancia- 25 barangays
Lemery- 31 barangays
Passi City- 29 barangays
San Dionisio – 29 barangays
San Enrique- 7 barangays
San Rafael – 9 barangays
Sara – 31 barangays
Sa interview sang Bombo Radyo kay Engineer Mae Magarzo, chief geologist sang Mines and Geosciences Bureau Region VI, iya ginpahayag nga ang mga low-lying areas ukon mga lugar nga malapit sa sapa kag suba amo ang prone sa pagbaha; samtang ang mga lugar nga yara sa mataas nga mga porsyon amo naman ang prone sa rainfall-induced landslides.
Suno kay Magarzo, napadal-an na sang abiso ang nasambit nga mga local government units agud nga mabalikan nila ang ila tagsa ka hazard map.
Gin-athag man ni Magarzo nga indi lang limitado sa sini nga mga lugar ang dapat nga mag-alerto; dapat man nga mangin vigilante ang mga tawo sa diin man nga bahin sang rehiyon bangud posible nga maglain pa ang lakat sang panahon.
Suno kay Michael Viola sang PAGASA Iloilo, base sa ila latest forecast track, kun indi magbag-o ang direksyon sang bagyo, mataas gihapon ang tsansa nga makalandfall ini sa Northern part sang Panay Island lakip na northern part sang Iloilo sa Domingo sang gab-i ukon Lunes sang aga.
Nagpaandam ang weather agency nga posible magbaskog pa ini liwat kag mahimo nga severe tropical storm antes mag-landfall sa eastern coast sang Caraga Region posible sa Domingo sang aga.
