ILOILO CITY- Nakuhaan sang masobra P1.3 million nga balor sang suspected shabu ang isa ka durugista sa Brgy. Muelle Loney, Iloilo City Proper.
Ang subject amo si Angelo Jimenez, 24, pumuluyo sang amo nga lugar.
Suno kay Police Captain Roque Gemino III, hepe sang Police Station 1, una nga nakuha kay Jimenez ang pulo ka sachets sang suspected shabu nga nagabug-at sang 95grams kag nagabalor sang P646,000.
Sang ginserbihan pa gid ini sang search warrant, nakit-an sa iya nga kwarto ang 38 caliber revolver kag dugang nga 100 grams sang suspected shabu nga nagabalor sang P680,000.
Pahayag ni Gemino, apat ka bulan nila nga gin-monitor ang subject kag bag-o gid lang nakaabot ang iya supply sang ginpatigayon ang operasyon.
Base sa imbestigasyon, si Jimenez ang konektado kay Angelito Colminares nga nadakpan man sadto sa drug buy bust operation.
