Nagalaum ang labor alliance kag iban pa nga mga kaupod nga grupo nga pamatian sang gobyerno ang petisyon sini nga pasakaan sang P250 ang daily minimum wage para sa mga mamumugon sa Western Visayas.
Pormal nga ginpasaka sang United Labor Panay ang petisyon sa Regional Tripartite Wages and Productivity Board sang Huwebes kag liwat nga ginpanawagan kadungan sang Labor Day, Mayo 1.
Sa interview sang Bombo Radyo kay Mr. Elmer Forro, ang Secretary-General sang Bayan Panay, iya ginpahayag nga sa tunga sang krisis sa ekonomiya, indi ayuda ang kinahanglan sang tawo kundi ang pagpasaka sa ila sweldo.
P550 ang regional minimum wage subong, apang suno kay Forro, nagakupos man ang balor ukon actual value sini bangud indi ini makalagas sa madasig kag daku nga pagsaka sa presyo sang mga nagapanguna nga balaklon.
Suno sa grupo, bangud sa pagluya sang purchasing power sang peso, ang matuod nga balor sang P550 nga daily minimum wage ang nagatupa na gid lamang sa P418.
Pahayag ni Forro, isa kuntani ka long-term solution ang wage increase kag madugay na ini nga gina-demand sa gobyerno.
Sang nagligad nga tuig suno sa iya, P200 ang gin-petisyon nga ipasaka kuntani sa sweldo, apang epektibo sang Nobyembre 19, 2025, yara lang sa P37 tubtub P40 ang gin-aprubahan nga daily wage increase para sa pribado nga sektor sa Western Visayas.
Suno kay Forro, ginpasaka nila sa P250 ang gin-petisyon nga wage increase subong bangud gina-forecast nga magasaka man ang inflation rate kasunod sang mga development sa Middle East kag ang epekto sini sa Pilipinas.
Sa pang-nasyunal nga lebel, ginatib-ong sang grupo ang kawsa nga pag-abolish ang Wage Rationalization Act kag pag-establisar sang national family living wage nga P1,200.
Natalana pa nga magpaguwa ang Regional Tripartite Wages and Productivity Board sang sabat sa amo nga petisyon sang grupo.#
