Ginsipa na ni Presidente Rodrigo Duterte sa iya nga posisyon si Presidential Anti-Corruption Commission Commissioner Manuelito Luna bangud sa pagpatawag niya sang imbestigasyon batok kay Vice President Leni Robredo may kaangtanan sa pagbulig niya sa apektado sang Coronavirus Disease 2019 pandemic.
Suno kay Presidente Duterte, wala sang rason si Luna nga paimbestigahan si Robredo.
Ginpa-andaman man sang presidente ang National Bureau of Investigation nga mangin kaangay ang ila dangatan kay Luna sa tion nga padayunon nila ang imbestigasyon kay Robredo.
Madumduman nga una na nga ginpahayag ni Luna nga nagakadapat nga pa imbestigahan si Robredo bangud sa ginapahayag pagpakig kompetensya niya sa gobyerno sa paghatag sang bulig sa mga apektado sang COVID-19.
Dugang pa sang natungdan, makabig ma nga ilegal ang pagpangayo ni Robredo sang donasyon sa pribado nga sektor bangud may yara na sang pondo nga natalana ang national government para sa pagpanghatag sang bulig sa mga apektado sang pandemic.
