Ginpaanggid sang social media personality nga si Jeffrey Celiz ang National Bureau of Investigation (NBI) sa Gestapo, ukon ang opisyal kag mapintas nga political police force nga gin-gamit sang una ni Adolf Hitler kag sang iya rehimen agud lagson ang mga kontra sini sa pulitika kag ang mga nagakontra sa iya ideolohiya.
Ginpahayag ini ni Celiz pagkatapos gin-aresto ang anay television broadcaster nga si Jay Sonza bangod sa pagpalapnag sang sala nga medical nga impormasyon nahanungod kay President Ferdinand Marcos Jr.
Sanday Celiz kag Sonza ang ginpasakaan sang kaso sang NBI sang Pebrero bangod sa cyberlibel kag unlawful use of means of publication.
Suno kay Celiz, katumbas sang arbitrary detention ang pag-aresto kay Sonza sang Huwebes sang gab-i, ilabi na gid nga regular holiday ang masunod nga adlaw, may weekend pa, kag indi pa gid siya makapiyansa.
Ginpahayag ni Celiz nga isa ini ka “very dangerous pattern” — mapintas, indi makatarungan nga paggamit sang layi, kag abuso sa gahum ang gin-obra sang ahensya nga para sa iya makabig nga tyrannical nga tikang.
Dugang pa niya, isa ini ka “warning signal” halin sa Marcos administration agud pahugon ang mga kritiko sang gobyerno. Sunod niya ini gintawag nga sistematiko nga pagpamahog, pang-bully, kag harassment.
Sang una nga interview sang Pebrero, nagpahayag si Celiz sa Bombo Radyo nga wala siya sang ginpaguwa nga peke nga medical nga dokumento nga may detalye nahanungod sa kahimtangan sang presidente.
Suno sa iya, ang iya lamang ginpaguwa amo ang iya reaksyon base sa opisyal nga pahayag sang Malacañang nga naospital si Marcos.
Ginpanindugan man ni Celiz nga indi pribado nga persona ang presidente, kag bangod siya ang nagapungko nga lider sang pungsod, ang iya kahimtangan isa ka seryoso nga isyu nga may nasyonal nga interes.#
 sa Gestapo ni Adolf Hitler.){kind=link}