Nagpatuman sang mas istrikto nga tikang ang Iloilo City Council batok sa paghimo kag pagpalapta sang false public safety alerts ukon peke kag makatalalang nga impormasyon nga mahimo magresulta sa kahadlok kag kakulba.
Ginpasar ang Anti-False Public Safety Alerts Ordinance of Iloilo City, nga ginpresentar ni City Councilor Rodolfo Jeffrey Ganzon sa ika-38 nga regular session sang Sangguniang Panlungsod.
Sakop sang ordinansa ang published, misleading, unverified ukon tinutuyo nga makatalang nga impormasyon nga ginapresentar bilang public safety warning, lakip ang mga ginapalapnag paagi sa social media, messaging applications, text messages, email, radyo kag printed materials.
Suno kay Ganzon, ang official public safety alerts sa Iloilo City ang mahimo lamang maghalin sa designated nga mga ahensya ukon opisina pareho sang Iloilo City Disaster Risk Reduction and Management Office, Office of the City Mayor, Iloilo City Police Office, kag iban pa nga mga authorized national government agencies.
Pahayag niya, para sa individual violators, ang multa ang yara sa P2,000 tubtob P5,000.
Para naman sa businesses, organizations ukon online pages, yara naman ang multa P5,000 kag possible pa ma-revocate ang ila nga business permit.
Ginpahayag pa ni Ganzon, kon minor naman ang nakalapas sang ordinansa, ang liability para sa multa ukon iban nga monetary penalties igahatag sa iya ginikanan ukon legal guardian.
Dugang pa niya, magakoordinar ang Iloilo City Government sa Department of Information and Communications Technology (DICT), National Telecommunications Commission (NTC), National Bureau of Investigation (NBI) kag Meta para sa technical investigation, digital forensics kag pag-trace sang mga nagapalapnag sang false public safety alerts.
