Subong na nga adlaw, Marso 12, ang deadline agud nga makumpleto ni Senator Robin Padilla ang walo ka mga pirma sang iban nga mga senador agud nga mabalabagan ang contempt order nga ginpaguwa sang Committee on Women, Children, Family Relations and Gender Equality batok kay Pastor Apollo Quiboloy bangud sa mga reklamo sang pagpang-abuso.
Pananglitan indi sini makumpleto ang walo ka signatories, buot silingon, i-retain ang contempt ruling sang chairperson nga si Senator Risa Hontiveros kag makakuha na sang otoridad gikan kay Senate President Juan Miguel Zubiri nga mag-isyu sang arrest order batok kay Quiboloy agud mag-atubang na ini sa hearing.
Sa subong, apat pa gid lamang ang nakapirma agud magpamalabag nga amo sanday: Senator Padilla, Senator Imee Marcos, Senator Cynthia Villar, kag Senator Bong Go.
Sa privilege speech ni Padilla sa Senado, naghingyo ini sa iya mga kaupdanan nga hatagan man sang konsiderasyon ang pastor bangud nagakahangawa lamang ini sa iya nga seguridad.
Sa baylo nga contempt order, Show Cause Order na lamang ang ipaguwa suno sa iya.
“Nais ko pong ihayag sa opisyal na rekord ang ating kahilingan: ang mabigyan po ng konsiderasyon ang hiling ni Pastor laban sa contempt order ng Committee on Women, Children, Family Relations and Gender Equality, at mabigyan ng daan ang pagpapalabas po ng Show Cause Order kay Pastor sa susunod na pagdinig,” suno kay Padilla.
Wala man nagapanago ang self-proclaimed “Appointed Son of God” suno sa iya bangud gusto man sini nga sabton ang mga akusasyon batok sa iya sa husto nga forum kun sadiin ginatahod ang iya kinamatarong sa due process.
“Isa po ang ating kahilingan para kay Pastor Apollo Quiboloy. Iyon ay ang mabigyan lamang naman natin, hindi po ng kapalit, kundi ng karampatang pagtrato ang naging serbisyo naman po ni Pastor sa ating bayan,” pahayag pa sini.
Una na nga gintawag ni Padilla si Quiboloy nga isa ka “baganihan” kag “biktima” bangud man sa pagbato sini batok sa komunista nga grupo.
Kahapon, Marso 11, nag-manifest man si Senator Hontiveros nga maga-desisyon ang iya committee base sa mangin desisyon sang mayorya.#
