Ginkondenar ni Defense Secretary Gilberto Teodoro Jr. ang ginhimo sang Beijing batok sa masobra 100 ka Pilipino nga ginapahayag nga gin-aresto sa China.
Ini ang kasunod sang statement ni Ministry of Foreign Affairs of China (MFA) spokesperson Guo Jiakun nga may ginahimo na nga tikang ang Beijing sunod sa layi batok sa masobra 100 Philippine nationals nga iligal nga nagapuyo kag nagatrabaho sa ila pungsod.
Suno kay Teodoro, ang amo nga tikang sang China isa ka sahi sang extortion kag blackmail batok sa mga Pilipino.
Ginpakamalaot man sang tiglikom ang ginapatihan nga pagpanghilabot sang China sa mga proseso sang law enforcement sang Pilipinas pati na ang ginatawag niya nga pagpang-blackmail batok sa mga Pilipino.
“We strongly condemn both the attempt by China to interfere in our law enforcement processes and the blatant blackmail against Filipinos,” suno sa opisyal.
Una na nga nagsiling ang Chinese Foreign Ministry nga nagpatigayon ang ila immigration authorities sang mga hugot nga operasyon batok sa mga foreigner nga ilegal nga nagasulod, nagapuyo, ukon nagatrabaho sa China.
Suno sa China, ginpatigayon ang operasyon suno sa ila mga kasuguan kag ginsiguro sang ila immigration personnel ang mga kinamatarong kag kaayuhan sang mga foreign nationals nga nadakpan.
Matandaan nga sang Mayo, may 69 ka Chinese nationals nga nadakpan sa isa ka operasyon sa isa ka steel plant sa Misamis Oriental.
Pahayag ni Teodoro, wala sang intensyon kag kapasidad ang mga Pilipino sa China nga maglapas sa Chinese law ilabi na sa amo kadaku nga paglapas nga ginahimo sang pila ka Chinese nationals nga yari diri sa Pilipinas.
Suno pa kay Teodoro, pananglitan mapamatud-an nga wala sang kaangtanan sa pagpangdaya sa mga Pilipino ang mga Chinese nationals, tratuhon sila pareho sang iban nga mga foreigner nga nagasunod sa kasuguan samtang yara sa Pilipinas.
“If these Chinese nationals were not involved in defrauding the Filipino people, which is now amplified by the cover up done by Chinese authorities, then they will be treated in the same way as other law abiding foreigners residing in the Philippines,” dugang sang Defense official.
