Ginbuyagyag sa hearing sang Senate Blue Ribbon Committee subong nga adlaw nga nagalab-ot sa P1 billion ang kwarta nga ginpadala sa penthouse ni Ako Bicol Rep. Elizaldy Co sa Shangri-La Hotel, Taguig.
Suno kay anay Bulacan 1st District Engineer Brice Hernandez, masobra sa 20 ka maleta sang kwarta ang ginkarga sa anom tubtob pito ka van pakadto sa penthouse sang kongresista.
Diri niya gintumod ang isa ka alyas “Paul” nga aide ni Co.
Suno sa iya, indi direkta nga nakigkita si Hernandez kay Co apang nakita niya ini samtang nagasugilanon kay anay DPWH-Bulacan district engineer Henry Alcantara nga iya nga anay boss.
Kaangot sini, ginkumpirma naman ni Jaypee Mendoza, anay assistant engineer, ang mga detalye sang pagdul-ong sang kwarta.
Suno sa iya, sa mga una nga tuig, sa Shangri-La Hotel ginapatigayon ang mga transaksyon, samtang sa mga nagsunod nga tuig, ginsaylo ini sa Valle Verde 6, nga balay sang kongresista sa Pasig.
Matandaan nga si Rep. Co ang former chair sang House Appropriations Committee kag kalakip sa mga mamalidha nga ginambestigaran kaangot sa anomalya sa flood control projects sang DPWH.
