ILOILO – Nagpagwa sang memorandum order si Iloilo Governor Arthur Defensor Jr. para sa mas istrikto nga pagpatuman sang health protocols.
Sa Memorandum Order nga napetsahan sang Marso 16, nakasaad nga una, dapat likawan ang pag-home quarantine sa mga COVID-19 positive nga mga pasyente nga nagabatyag sang sintomas.
Gina-abisuhan ang mga Local Government Unit (LGU) nga magbutang gid sang isolation facility sa kada barangay para sa mga symptomatic nga mga pasyente.
Ikaduha, sa sulod sang 24 ka oras ukon isa ka adlaw matapos ma-detect ang COVID-19 case, dapat nga ma-trace na, ma-identify, kag ma-subject sa quarantine measures ang tanan nga close contacts sang infected nga pasyente.
Ikatatlo, ginaabisuhan ang mga banwa kag syudad nga imonitor sang istrikto ang clustering sang COVID-19 cases kag kun ipatuman ang containment measures kaangay sang lockdowns, dapat nga nagasunod ini sa National Task Force COVID-19 Zoning Containment Strategy.
Sa interview sang Bombo Radyo kay Defensor, iya ginpahayag nga tuyo sang iya nga memorandum order ang mas maayo nga detection kag isolation kun may marecord nga COVID-19 cases.
Ang memorandum ang addressed sa provincial director sang Iloilo Police Provincial Office, chiefs of police sang mga banwa kag component city, mga alkalde sa mga banwa kag syudad, kag sa mga punong barangay sa probinsya.
