Planuhan sang gobyerno kun kinahanglan nga mag-import sang bugas bangud sang tuman ka nubo nga buffer stock subong sang National Food Authority (NFA).
Suno kay Presidente Ferdinand ‘Bongbong’ Marcos Jr. nga amo ang tiglikom sang Department of Agriculture (DA), base sa makit-an subong, dapat nga pasakaan ang buffer stock agud nga maglawig sang siyam pa ka adlaw.
Ginabakal ang buffer stock sa local producers suno kay Marcos apang ang problema amo ang resulta nga pagmahal man sa presyo sang bugas sa local markets.
Lakip sa gina-konsiderar nga adjustment suno sa presidente amo ang indi gulpyada nga pagbakal.
“Ang problema, kapag sila ay pumasok sa merkado, ‘pag sila ay namili na para i-replace yung buffer stock na ang kulang nila ay tataas naman ang presyo ng bigas dahil marami silang bibilin. Kaya’t yun ang hinahanapan namin ng paraan para i-adjust. Siguro ang magagawa natin ay ang pagbili ay hindi bigla. Hindi malaki,” paathag sang presidente.
Antes sang pahayag sang presidente, may yara sang rekomendasyon nagikan sa NFA nga mag-import sang 330,000 metric tons sang bugas bangud sa kakulangan sa buffer stock.
Ini nga proposal ang ginapahayag nga preparasyon man para may suplay nga gamiton sa tion sang kalamidad halin sa Hulyo tubtub sa Disyembre subong nga tuig.
‘BASTANTE NGA GENERAL SUPPLY’
Ginpahayag man sang presidente nga kun general supply naman sang bugas sa pungsod ang pagahambalan, wala sang nakit-an nga kakulangan mangin sa masunod nga mga binulan.
Ginpahayag man sini nga ginahimo sang gobyerno ang tanan nga tikang agud makontrol ang presyo kag indi magsaka.
Kun lantawon ang 2023 supply outlook sang DA, ang kabug-usan nga suplay sang pungsod ang yara sa 16.98 million metric tons nga bastante na agud nga ma-cover ang demand subong nga tuig nga ginabanta yara sa 5.29 million metric tons. ##
