Ginbusisi sa isa ka hearing sa House Committee on Health ang proseso sang pagreport sang Department of Health sang daily tally sang COVID-19 sa pungsod.
Ini matapos ginpahayag ni Marikina Rep. Stella Quimbo nga nag-leak ang data sang DOH kun sa diin nakaabot sa iya ang data nga para pa kuntani sa reporting sa masunod nga adlaw.
Ginkwestyon ni Quimbo kun gina-engineer sang DOH ang data bangud Marso 19 pa lang, nakita na niya ang text nga 7,999 new infections ang dapat nga ireport para sa Marso 20 nga data.
Ginpaathag naman ni Health Undersecretary Maria Rosario Vergeire nga kun nasumite na ang data sa ila sa DOH, pila ka oras pa ini nga ginaproseso sang ahensya kag nagakaabtan pa sang masunod nga adlaw para sa final reporting ng cases.
Suno kay Vergeire, ang draft numbers ang posible nga nag-leak halin sa isa ka tawo sa DOH kag posible nga nakaabot sa mamalidha.
Ginpasalig man ni Vergeire nga nagahalong ang DOH sa pag-uyat sang mga data agud nga indi ini mag-leak antes pa man makumpleto ang validation.
