Ginpanindugan sang chairman sang House committee on ethics and privileges nga na-mensyonar lamang sa iya nga report ang designation sang Anti-Terrorism Council kay Negros Oriental Rep. Arnolfo “Arnie” Teves Jr. bilang “terorista”, apang indi amo ini ang basehan kun ngaa gin-rekomendar ang pagpahalin siya sa pwesto.
Ini matapos gin-kwestyon ni Iloilo 1st District Rep. Janette Garin kun ngaa gindala ini sa report apisar nga ang pag-designar kay Teves bilang terorista ang magaagi pa sa process of appeal kag final decision.
Ginsulit man ni Alliance of Concerned Teachers (ACT-Teachers) Rep. France Castro ang amo nga inquiry ni Garin.
Sabat ni Representative Felimon Espares, nalakip lamang ini sa gin-diskusyunan sang committee, apang indi ini ang factor sa rekomendasyon nga sipaon si Teves halin sa Kamara.
Matandaan nga Agusto 1 sang ginpaguwa ang desisyon sang Anti-Terrorism Council nga gina-designar si Teves bilang terorista kaupod ang iya utod nga si former Negros Oriental governor Pryde Henry Teves kag 11 ka iban pa bangud sang gin-alegar nga ila nga involvement sa pinatyanay sa Negros Oriental. #
