Gin-umpisahan na sang Armed Forces of the Philippines (AFP) ang pagbakuna sa ila mga personnel partikular na sa ila frontline medical personnel gamit ang coronavirus vaccine sang Chinese firm nga Sinovac Biotech.
Ang ceremonial vaccination ang ginpatigayon sa AFP Health Service Command main lobby kadungan man sa una nga adlaw sang vaccination rollout sa pungsod.
Ang una nga doses sang bakuna ang ginbaton sang commanding officer sang Victoriano Luna Medical Center nga si Doctor Colonel Fatima Claire Navarro kag duha ka iban pa nga mga doktor nga sanday Lieutenant Colonel Cynthia Liao kag Major Joel Lorenzo Rollo.
Una na ginpahayag ni AFP chief Lieutenant General Cirilito Sobejana nga 50,000 doses sang COVID-19 vaccines ang ginpain para sa mga AFP personnel kag hatagan sang prayoridad ang mga frontliners.
Nahibaluan nga 100,000 doses tanan ang ginhatag sa Department of National Defense.
Matandaan nga kaina sang aga, sa symbolic vaccination ceremony nga ginpatigayon sa University of the Philippines-Philippine General Hospital nga gintambungan sang matag-as nga opisyal sang national government, ang first official recipient sang Sinovac vaccine amo si UP-PGH director Dr. Gerardo Legaspi.
Ang bakuna ang gin-administer sang nurse nga si Chareluck Santos.
Nagbaton man sang bakuna sanday Vaccine czar Secretary Carlito Galvez Jr., Food and Drug Administration (FDA) chief Eric Domingo kag testing czar Secretary Vince Dizon.
Samtang suno naman kay Health Undersecretary Maria Rosario Vergeire, ginalauman nga matapos na ang rollout sang 600,000 doses sang Sinovac COVID-19 vaccine sa Pilipinas sa sulod sang duha tubtob tatlo ka semana.
