Nagasamo ang reaksyon sang pila ka mga ginikanan sa probinsya sang Iloilo may kaangtanan sa pagbalik sang pagpatuman sang face-to-face ukon physical classes sa mga pili nga eskwelahan sa low-risk areas sa Pilipinas sa 2021.
Isa sa mga nagapamatok sa pagbalik sang face-to-face nga klase amo si Aireen Aiko Tuvillara, isa ka iloy nga taga-syudad sang Passi kag may yara sang first year high school nga anak nga nagaeskwela sa Iloilo City kag isa pa ka anak nga nagaeskwela sa kindergarten sa Passi City.
Sa interview sang Bombo Radyo kay Tuvillara, iya ginpahayag nga indi pa niya luyag nga magbalik sa mga eskwelahan ang mga estudyante bangud may yara gihapon sang COVID-19 pandemic kag indi niya masigurado kun sin-o ang makaupod sang iya nga anak.
Sa pihak nga bahin, pabor naman ang isa ka iloy nga taga-banwa sang Calinog nga magbalik na sa eskwelahan ang nga iya mga anak.
Ini nga iloy amo si Maria Richell Gonzales nga may mga kabataan nga yara pa lang sa Grades 1, 3, kag 5.
Suno kay Gonzales, nabudlayan gid sila umpisa sang ginpatuman ang modular learning ilabi na bangud wala man siya nakatapos sa elementarya kag lain na ang iya mga natun-an ipaanggid sa mga leksyon sang mga estudyante subong nga panahon.
Pahayag ni Gonzales, nakatapos man kuntani sa high school ang iya nga bana apang wala man ini nagatinir sa ila nga balay bangud may trabaho man ini kun adlaw.
Magluwas diri suno kay Gonzales, wala man sang nagalagaw sa ila nga barangay bangud suludlon ini nga lugar sa banwa sang Calinog.
Suno pa sa natungdan, kun ipatuman ang face-to-face classes, i-monitor lang niya sang maayo ang iya nga mga kabataan agud diretso ang mga ini sa pagpauli sa ila nga balay.
