ILOILO CITY – Makabig nga illegal ang pagbalik sang sidewalk vendor sa higad sang dalan subong nga holiday season.
Ini matapos nga naggutok ang sidewalk sa palibot sang city proper area matapos nga nagbalik ang mga sidewalk vendor.
Sa interview sang Bombo Radyo kay Iloilo City Mayor Jerry Treñas, iya ginpahayag nga wala naaprobahan ang hingyo sang sidewalk vendors bangud nga wala na subong sang sesyon ang Sanguniang Panglungsod.
Suno kay Treñas, iya nga ginpalab-ot sadto sa sesyon ang hingyo sang mga side walk vendor apang wala ini naaprobahan.
Ginpahayag ni Treñas nga kun siya lang, wala siya sang kinamatarong nga dulaon ang ordinansa nga ginadumili-an ang obstruction sa higad sang dalan matapos nga ginmandu ni Presidente Rodrigo Duterte ang Oplan Hawan.
Nahangpan man sang alkalde ang kawsa sang sidewalk vendors apang kinahanglan nga sundon kun ano ang layi.
Ginatugyan na sang natungdan sa Oplan Hawan team ang pagpahalin kag pagdakop sa mga sidewalk vendor nga wala nagasunod sa pagsulundan.
