ILOILO CITY – Ginakabig ni Presidente Ferdinand Marcos, Jr. nga pinakamaayo nga birthday gift ang pagbaton sang Implementing Rules and Regulations sang New Emancipation Act.
Ini ang ginpahayag sang presidente sa iya social media post kagab-i, pila ka oras antes ang iya ika-66 anyos nga kaadlawan.
Ang birthday wish naman sang presidente amo nga mangin maayo na ang agrikultura kag mahibaluan kun ano gid ang tyempo agud nga mabuligan ang mga mangunguma.
Kadungan man sang iya kaadlawan subong nga adlaw, magapadulong ang presidente sa Singapore para magtambong sa 10th Asian Conference kaupod sa mga economic managers kag business leaders.
Suno sa Presidential Communications Office, samtang yara sa Singapore, magatambong man ang presidente sa Singapore Grand Prix 2023- Formula 1 night race sa weekend kasunod sang imbitasyon ni Singaporean Prime Minister Lee Hsien Loon.
Suno pa sa Malacañang, may 30-minutos nga talk si Marcos sa amo nga conference.
Siya man ang labing-una nga incumbent Philippine president nga mag-address sa Milken Institute’s Asia Summit.
Matandaan nga sang Septyembre 2022, may state visit si Marcos sa Singapore kag nangin kontrobersyal bangud sa pagbalik sini sa amo nga lugar isa ka bulan lang ang nakaligad agud nga magtambong sa popular nga F1 Grand Prix.
