ILOILO – Ginatugyan ni Iloilo Governor Arthur Defensor Jr. sa mga alkalde sang mga banwa sa Iloilo kag component city nga Passi ang pagdesisyon natuhoy sa mga restrictions sa Holy Week.
Una diri, sa syudad sang Iloilo, nagpagwa si Mayor Jerry Treñas sang executive order No. 029 kun sa diin ginamandu nga temporaryo nga pagasiraduhan ang tanan nga mga beaches, inland resorts, kag waterparks sa Semana Santa bilang kabahin sang pagpanagang batok sa COVID-19.
Sa interview sang Bombo Radyo kay Defensor, iya ginpahayag nga wala siya sang sweeping order agud sundon sang tanan nga banwa sa probinsya sang Iloilo.
Una na nga nagpanirado ang mga pilgrimage sites suno kay Defensor apang may yara sang mga resorts nga indi para sa pilgrimage kag may naka-book nga mga magpamilya.
Lain-lain ang sirkumstansya sa kada banwa suno kay Defensor kag ginarespeto niya ang desisyon sang alkalde sang LGU.
Una naman nga nagpangabay si Defensor sa publiko nga indi paghimuon nga bakasyon ang balaan nga semana kundi gamiton ini nga tion agud nga makapamalandong sang maayo sa sulod sang balay.
