Ginaduso sang Department of Agriculture (DA) nga maghimo sang cropping calendar para sa bilog nga pungsod agud nga wala sang mausik sa mga produkto sang mga mangunguma kag malikawan ang oversupply.
Suno kay Agriculture Undersecretary for Consumer and Political Affairs Kristine Evangelista, paagi sa cropping calendar, makapangita na nga daan sang buyers antes pa man mag-harvest ang mga mangunguma.
Ang cropping calendar amo ang schedule sang growing season halin sa pag-preparar sang gamiton nga duta tubtub sa crop establishment tubtub sa maintenance (halimbawa, weeding kag fertilizing) tubtub sa pag-ani.
Depende man ang kalawigon — halin sa establishment tubtub sa harvest — depende sa tanum sang mangunguma.
Ang pagduso sini ang kasunod sang report nga may kinahon sang kamatis nga ginpanghaboy sang mangunguma sa Bukidnon bangud naga-sululobra lang kag wala na sang nagabakal.
Kun basehan naman ang latest data sang Philippine Statistics Authority (PSA), nagnubo na gani ang produksyon sang kamatis sa 90,000 metric tons sa first quarter sang tuig. Halin ini sa 95,870 metric tons sa amo man nga quarter sang nagligad nga tuig.
Suno naman sa DA, naga-preparar naman ang ahensya sa paghatag sang grants sa mga kooperatiba agud nga makahatag sang nagakaigu nga pasilidad agud ma-proseso ang agricultural produce kag mahimo sa mga produkto kaangay sang sun-dried tomatoes, tomato sauce, ukon tomato juice.
Suno sa DA, mahimo nga makapakig-angot ang kooperatiba sa regional field offices sang ahensya para maka-avail sang grants.
