ILOILO – Nalipay ang newly-appointed Officer-In-Charge sang Bureau of Fire Protection (BFP) Western Visayas nga makabalik na siya sa rehiyon apang kadungan sini amo ang promisa nga pa-imbestigaran niya ang natabo nga kontrobersiya sa ginapahayag paglapas sang pamunuan sa quarantine protocol.
Ang bag-o nga OIC amo si Fire SSupt Jerry Candido, anay director for logistics sang BFP Central Office kag naka-agi man sa pagserbe bilang Iloilo City Fire Marshal.
Siya ang nagbulos sa pwesto matapos gin-relieve si anay Regional Director F/SSUPT Roderick P. Aguto.
Ginbun-ag si Candido sa Guimbal, Iloilo apang diri na sa syudad nag-eskwela halin sang elementary tubtob sa kolehiyo.
Sa interview sang Bombo Radyo kay Candido, iya ginpahayag nga yara pa siya subong sa national headquarters apang ginatinguhaan niya nga makasakay padulong diri sa syudad sa labing madali nga panahon.
Sa subong suno sa natungdan, ginmanduan na ni Interior and Local Government Secretary Eduardo Año si BFP Chief Jose Embang nga magdihon sang Special Investigation Task Group.
Ini may kaangtanan sa pagpositibo sa Covid-19 sang personnel sang BFP 6 apang nagpanglugayawan pa sa Boracay kag gintago pa sang ahensya ang pila ka importante nga impormasyon tuhoy sa iya.
#
