ILOILO CITY – Wala pa ginakonsiderar sang Iloilo City Government nga pahanugutan ang hingyo sang Integrated Bar of the Philippines nga ipalayag ang identity sang COVID-19 patients.
Sa interview sang Bombo Radyo kay Iloilo City Mayor Jerry Treñas, iya ginpahayag nga wala pa man sang problema sa contact tracing bangud nga nagapanugid ang mga pasyente kun sanday sin-o ang may close contact sa ila.
Suno kay Treñas, madamu sang dapat nga ikondiderar antes ipalayag ang identity sang pasyente kasubong na lang sa isyu sang seguridad.
Ginatun-an pa kun bala palawigon ang Enhanced Community quarantine sa syudad sang Iloilo.
Ginpahayag ni Treñas nga iya pa nga ginahulat ang desisyon sang Inter-Agency Task Group kag sang City Health Office kun ano ang makapaayo.
Sa subong suno sa alkalde, dapat nga sundon ang home quarantine agud nga indi na madugangan ang COVID-19 patients.
Ginakasubo man sang natungdan nga may yara sang isa ka pulis sa syudad sang Iloilo nga ginakabig nga Persons Under Investigation.
Bangud sini, naglab-ot sa 40 ka pulis suno sa alkalde ang ginakabig nga Persons Under Monitoring.
Bangud nga may yara sang local transmission, nagahingyo si Treñas sa tanan nga pumuluyo sa syudad nga indi magguwa sa balay kun indi kinahanglan.
