ILOILO – Target sang Philippine Army nga mapapas ang mga rebelde nga grupo subong nga 2020.
Ini ang kasunod sang pagplastar sang accomplishments sang 3rd Infantry Division sang Philippine Army nga ginapamunu-an na subong ni Brigadier General Eric Vinoya.
Suno kay Captain Cenon Pancito III, tagpamaba sang 3rd Infantry Division sang Philippine Army, madamu ang significant accomplishment sang 2019 kag kabahin diri amo ang decommissioning sang 727 ka rebelde kag pagsungka sang 337 ka bilog nga armas luthang sang Kapatiran para sa Progresibong Panlipunan, Inc. ukon kilala sadto nga Rebolusyunaryong Partido ng Manggagawa-Pilipinas/ Revolutionary Proletarian Army-Alex Boncayao Brigade-Tabara Paduano Group.
Ginpahayag ni Pancito nga ang decommissioning sang mga anay rebelde sa Capiz ang ginpangunahan mismo ni Presidente Rodrigo Duterte nga ginakabig nga milestone.
Magluwas diri, naglab-ot man sa 259 nga regular members kag militia ng Bayan sang Comunist Party of the Philippines -New People’s Army ang nagbalik sa sabak sang gobyerno sa diin 45 diri ang halin sa Panay Island, 214 ang naghalin sa Negros Occidental samtang naglab-ot sa 125 ang ginsungka nga armas-luthang.
Sang nakaligad nga tuig, naglab-ot sa 36 ka engkwentro ang natigayon nga nagresulta sa pagkapatay sa 10 kag pagkadakop sa 29 ka rebelde sa diin naglab-ot sa 107 ka armas-luthang, 38 ka anti-personnel land mines kag pagkatukib sang 18 ka kampo sang rebelde.
Magluwas sa combat operations, nagbulig man ang Joint Task Force SPEAR sang 3rd Infantry Division sa pagpatigayon sang rescue kag relief operation sa tion sang kalamidad.
Paagi sa Executive Order 70, mas ginpabaskog ang whole-nation approach sa pagtapna sang insurhensya kag subong nga 2020, ginalauman suno sa natungdan nga mas ginpabaskog pa ang combat ooperations agud nga mangin violence-free ang pungsod ilabi na sa Visayas.
