Ginpasalig ni President Ferdinand Marcos Jr. nga pangitaan sang gobyerno sang tanan nga paagi nga mapapauli nga hilway sa katalagman ang 17 ka Filipino seafarers nga nalakip sa crew sang barko nga gin-hijack sang Houthi rebels sa Red Sea.
Suno kay Marcos, gina-finalize na sang gobyerno ang gintukod sini nga high-level delegation nga ipadala sa Tehran, Iran nga amo ang makig-negosyar sa mga rebelde agud nga maluwas ang mga overseas Filipino workers.
Una na nga nagpahayag ang Department of Foreign Affairs (DFA) nga maayo ang kondisyon sang 17 ka Pinoy kag malapit na lang nga hilwayon sang mga rebelde.
Nalakip sa Filipinos nga crew sang cargo ship nga Galaxy Leader nga gin-hijack sang mga rebelde amo ang isa ka Ilonggo nga tumandok sang Barangay Pagsangaan, Pavia, Iloilo.
Nagpangayo man sang pasaylo si Marcos sa Filipino community nga nagapaabot kuntani sa iya sa United Arab Emirates.
“May mga bagay na kailangan agad na asikasuhin. Isa na dun ‘yung ating mga kababayan, mga kapwa Pilipino natin na na-hostage, 17 sila na na-hostage at ginagawa natin lahat ng paraan upang sila ay maiuwi na. Kaya’t, siguro naman maunawaan ninyo, na inuna muna natin ‘yan dahil kailangan nating tiyakin ang syempre ang seguridad ng ating mga kababayan,” pahayag sang presidente sa video message.
Una na nga gin-anunsyo sang presidente nga ikanselar sini ang pagtambong sa 28th Conference of the Parties to the United Nations Framework Convention on Climate Change (COP28) sa Dubai bangud prayoridad niya nga asikasuhon ang ikaayo sang na-hostage nga mga seafarers.
Ginpahangop man sini nga gina-una sang gobyerno ang pag-atender sa mga overseas Filipino workers nga ginapabalik diri sa Pilipinas bangud apektado sang away sang Hamas kag Israel. #
