ILOILO CITY – Hugot nga ginadumilian sang mga opisyal sa Brgy. Aguinaldo, La Paz, Iloilo City ang pagpatigayon sang pagsugal sa mga namatyan sa ila lugar.
Sa interview sang Bombo Radyo kay Punong Barangay Moros Guarin sang nasambit nga barangay, iya ginpahayag nga bilang isa ka retired police, nakahibalo siya nga iligal ang pagapanahor kag indi dapat nga i-tolerar sa ila lugar.
Suno kay Guarin, may mga pumuluyo na nga nagpalapit sa iya kag nagapamangkot kun mahatagan sila sang permiso nga makasugal sa mga namatyan agud may ara man sila sang tipun-tipunan kag lingaw-lingawan tubtob sa aga.
Apang suno sa natungdan, indi man siya mahimo nga makahatag sang permit ilabi na kun wala man gani sang ginahatag nga permit ang Iloilo City Government kag ang Iloilo City Police Office.
Dugang pa sang opisyal, wala man sang mandu ang Department of Interior and Local Government nga nagahatag sang abiso sa mga punong barangay nga mahimo sila magmato-mato sa pagpasugot kun may nagahingyo sa pagpanahor ilabi na ang tumbo.
Suno pa kay Guarin, sa tion nga magpamilit gid ang mga pumuluyo, risgo na nila ini kag sila na ang bahala nga manabat sa kapulisan.
