Nagpaandam ang isa ka board-certified dermatologist nga posible magresulta sa impeksyon ang ingrown toenail kun indi gilayon matatapan ukon kun indi mahatagan sang nagakaigu nga pagtamod.
Isa ini ka kondisyon kun sa diin ang kilid sang kuko ang nagatubo pakadto sa panit.
Sa interview sang Bombo Radyo kay Dr. Aizlyn Robledo, iya ginpahayag nga mahimo mag-nana ang apektado nga tudlo.
Kun may impeksyon naman, posible ini maglapta indi lamang sa panit kundi pati sa tul-an kag mag-apekto gid sa overall health sang tawo.
“Ang common nga kumplikasyon is infection. Ma-nana siya kag masakit. Ang infection daan sa lawas naton, pwede na siya maglapta. Una sa panit lang kag gina-underestimate naton, [pero] kun diabetic ka, dugay mag-ayo,” suno sa doktor.
Dugang niya: “Pwede siya mag-spread sa deeper nga part sang aton nga panit, kag kis-a, sa super lala nga kaso, nagaka-infect man ang aton nga bone. Daw gina-it-it ya ang aton nga tul-an. It can be dangerous kun ginapabay-an or wala naton gina-treat.”
Kun maglapta ang impeksyon suno sa iya, delikado ini ilabi na sa mga tigulang kag may existing condition kaangay sang diabetes kun sa diin may maluya na nga immune system ang tawo.
Pila sa ginlawag sang dermatologist nga common nga rason sang ingrown amo ang masami nga basa nga tiil, pagsuksok sang gutok nga sapatos, kag ang indi husto nga pag-trim ukon pag-utod sang kuko.
Mahimo man magresulta sa ingrown ang injury ukon trauma pananglitan halimbawa masami ginalukit ang kuko, ukon kun mahulugan sang mabug-at nga bagay ang tiil.
𝗔𝗡𝗢 𝗔𝗡𝗚 𝗧𝗥𝗘𝗔𝗧𝗠𝗘𝗡𝗧?
May mga abiso nga kun may ingrown ang isa ka tawo, dapat nga ihulom ang tiil sa maalabaab nga tubig.
“Kun early-stage pa lang —sakit pa lang, pula pa lang, indi pa grabe ang banog — pwede naton ma-obra ini. Pwede ma-soak ang tiil or itusmaw sa balde sang 10-20 minutes [sang] 3-4 times a day para maghumok na siya,” suno kay Robledo.
Apang dugang niya, kun sala ang pag-obra sang proseso, mahimo ini ma-infect.
“Kun humok-humok na ang panit, ang iban gabutang sang gamay nga cotton sa kilid sang kuko, para nga maangat or magsaka, magtubo diretso paabante… pero this is very complicated sa iban nga tawo kay basi indi tinlo ang pang-obra nila, ma-infect pa gid,” pahayag pa sang dermatologist.
Nagpanugyan man ini nga kun nagakinahanglan kag kun indi sigurado sa treatment, magpalapit sa dermatologist para sa nagakaigu nga bulig.
“Kis-a daan kun maglala na, surgery na ang kinahanglan sang nail, so importante gid nga ipa-check up kun maglala,” dugang niya.#
