GUIMARAS – Temporaryo nga siraduhan sa publiko ang Balaan Bukid sa Barangay Hoskyn, Jordan, Guimaras kadungan sang Holy Week celebration subong nga 2021.
Santo sa Executive Order No. 17 nga ginpagwa ni Jordan Mayor Ruben Corpuz sang Marso 12, ginpahayag nga ipatuman ang temporary closure epektibo sa Marso 31, 2021 (Miyerkules Santo) las otso sa aga tubtob sa Abril 3, 2021 (Sabado de Gloria) las otso sa aga.
Ang pagdumili sa pilgrims and guests subong nga tuig ang kabahin sa gihapon sang pagpangudal sa probinsya sang Guimaras agud indi magsaka ang kaso sang COVID-19.
Sa amo nga executive order, nakasaad nga ang municipal engineering office ang dapat magbutang sang barikada sa tanan nga entry points sa Balaan Bukid sa amo nga petsa.
Ang mga opisyal sa Barangay Hoskyn kag Barangay Balcon Melliza ang ginmanduan nga magbantay sa lugar samtang may temporary closure.
Ang Jordan Municipal Police Station ang kinahanglan mag-deploy sang personnel para sa police visibility.
Ang opisina sang alkalde kag ang Municipal Tourism Office ang in charge sa information dissemination kag sa coordination.
Sa interview sang Bombo Radyo kay Mayor Corpuz, iya ginpahayag nga kaangay sang natabo sang 2020, kanselado man sa gihapon ang Holy Week Presentation nga “Pagtaltal sa Balaan Bukid”.
Ginabanta 10,000 ka local kag foreign tourists ang nagadugok sa Balaan Bukid para sa pilgrimage kada tuig apang suno kay Mayor Corpuz, ipaiway ini nga aktibidad agud maproteheran ang public health.
