Nagpanawagan si President Ferdinand ‘Bongbong’ Marcos, Jr. nga untaton na ang pagduso nga i-separar ang Mindanao sa Pilipinas.
Lakip ini sa kaundan sang speech ni Marcos sa “Constitution Day 2024” sa Makati City, Pebrero 8, isa ka semana matapos ginpaguwa ni anay Presidente Rodrigo Duterte ang panawagan nga ibulag na ukon isipak ang Mindanao.
Gintawag naman ini ni Marcos nga isa ka paglapas sa Konstitusyon sang pungsod.
“I strongly appeal to all concerned to stop this call for a separate Mindanao. This is a grave violation of the constitution,” kabahin sang speech nga ginpalakpakan sang mga tawo.
Suno pa sa presidente, mangin ang liderato sang Bangsamoro Autonomous Region in Muslim Mindanao (BARMM) ang nagbasura sa sini nga proposal.
Ini nga rehiyon ang na-establisar sang 2019, natukod sa idalom sang Bangsamoro Organic Law, kag amo ang nagbulos sa Autonomous Region in Muslim Mindanao.
Ginalakipan ini sang mga probinsya sang Basilan, Lanao del Sur, Maguindanao, Sulu, kag Tawi-Tawi kag 63 ka mga barangay sa North Cotabato.
Matandaan nga sang ginsapubliko ni Duterte ang iya panawagan sang nagligad nga semana, nagpaguwa man sang suporta si BARMM Chief Ahod Ebrahim para sa Marcos administration kag sa implementasyon sang Comprehensive Agreement on the Bangsamoro nga amo ang naggiya kun ngaa natukod anay ang amo nga rehiyon.
Dugang pa sang presidente, ang panawagan nga iga-separar ang Mindanao sa Pilipinas ang wala nagasanto sa “Bagong Pilipinas” nga amo ang brand sang panggobyerno nga ginatukod sang Marcos administration.
Gintawag ini sang presidente nga isa ka sahi sang pagwasak sang nasyon.
Ginplastar man ni Marcos nga wala ginakilala sang Konstitusyon ang kinamatarong sa rebellion bangud sa baylo, ginasilutan ini sa idalom sang layi.
“For this reason, unlike in other constitutions, there is nothing in ours that allows the breaking up of this union, such as an exit provision. On the contrary, the Constitution does not recognize the right to rebellion, while our criminal laws punishes it,” suno diri.
Diri kag ginsulit ni Marcos ang statement nga sulit-sulit na sini nga ginpalayag sa iya mga speech halin sang nagpungko siya bilang presidente — nga indi sini pagtugutan nga may makuha nga bisan gamay lamang nga parte sang teritoryo sang Pilipinas.
Matigdas man nga nagpaandam ang presidente nga pangapinan sini ang pungsod sa mga pagpamahog kag indi sini pagtugutan bisan ang suhestyon nga tungaon ang nasyon.
“We will continue to defend from any threats, external and internal. We will not allow even an iota of suggestion of its breaking apart. On this part of the Constitution, there is simply no dynamism or flexibility. This is my guarantee not only throughout this term but up to my dying breath,” dugang sang presidente. #
