Nagpanawagan sang accountability ang mga pasahero nga sakay sang eroplano nga nagpatigayon sang emergency landing sa Iloilo International Airport matapos nakulangan ini sang oxygen supply sa cabin.
Ang involved amo ang Philippine Airlines Flight PR 2544 nga halin sa Dumaguete, Negros Oriental pakadto sa Manila.
Isa sa mga pasahero amo si Coach Rhuel Beaujing Acot sa idalom sang grassroots program sang Samahang Basketbol ng Pilipinas (SBP).
Kaupod sini sanday SBP Talent Identification Program Head Coach Norman Black kag Larry Fonacier nga nagkadto sa Dumaguete para magtudlo sa mga kabataan sa sulod sang tatlo ka adlaw.
Sa interview sang Bombo Radyo kay Acot, iya ginpahayag nga antes pa man maka-take off ang eroplano, wala na nga daan naga-function ang air-conditioning system apang wala pa sang nag-reklamo sang amo nga tion bangud ginpinsar nila nga kabahin pa ini sang protocol.
Sang yara na sa kahawaan, didto na kag nagahibi na ang iban nga bata, nagapamalhas na ang mga pasahero, kag nag-ilis na ang iban sang mas komportable nga bayo bangud sa kainit.
Sang ulihi, ginkumpirma na sang piloto nga may problema sa air-conditioning system antes pa man sila maghalin sa runway.
Nagpangayo ini sang pasaylo kag nagsiling nga kun ano man ang emerhensya, magahugpa sila sa Iloilo ukon sa Mactan, Cebu.
Suno kay Coach Acot, tuman ang ila kahadlok ilabi na nga ini ang iya una nga bes nga naka-eksperyensya nga ginhulog ang aircraft oxygen masks agud masuksok sang mga pasahero.
Kun nadugayan pa suno sa iya, mahimo nga na-suffocate gid sila.
“May mga batang umiiyak na. Pag nakita mo yung window, nag-mo-moisture na. That means there is no enough oxygen already. So nag-drop ang oxygen masks. And we were instructed to have that mask, kasi ang ginawa pala niya [ng pilot], he tried to bring it up sa air na pinakamataas para mag-cool, kasi sobrang init. Pero hindi lumamig, nothing,” suno kay Acot.
Dugang sini: “It’s scary. It’s scary. First time I saw masks dropping. Maraming elderly, maraming tourists.”
Ginsaysay man sini nga sang nakaabot na sila sa Iloilo, isa lang ang pwertahan nga mahimo agyan sang mga pasahero.
Bisan ginbuksan ang pwertahan sa likod suno sa iya, wala man sang hagdanan gani nga sa una lang sila nga bahin sang eroplano mahimo makalabay bisan nga madamo na ang nabudlayan sa pagginhawa.
May mga nag-collapse pa suno sa iya.
Sa statement sang Iloilo International Airport, ginkumpirma nga may mga pasahero nga nagkinahanglan sang medical assistance.
Magluwas diri, bisan gab-i na, yara pa sila gihapon sa Iloilo Airport.
Suno kay Acot, gin-una ang international tourists bangud sa ila connecting flight, samtang naka-schedule naman sila bwas pa sa hapon.
Natalana pa nga magpagwa sang statement ang Philippine Airlines kasunod sang amo nga insidente.#
