Nagapadayon ang backtracking kag profiling sang Passi City Police Station batok sa mga suspek nga responsable sa pag-pangransak sa branch sang isa ka retail store sang Huwebes nga adlaw, Hulyo 2.
Sa interview sang Bombo Radyo kay PLTCOL. Herman Magbanua, hepe sang Passi City Police Station, iya ginpahayag nga asta sa karon ginatumod pa ang identity sang mga suspetsado.
Ila man nga gina-review ang CCTV Footage malapit sa lugar.
May na-recover man nga forensic evidence kaangay sang mga tsinelas kag iban nga pamatuod nga may natabo nga kinawatay sa amo nga retail store.
Pahayag pa ni Magbanua nga ila na sa karon ginakonsiderar ang tatlo ka mga person of interest sa amo nga krimen.
Suno pa kay Magbanua nga ila man ginasundan sa karon nga anggulo amo nga inside job ang natabo bangud nagaguwa sa imbestigasyon nga nag-agi sa atop kag nagsuhot sa kisame ang mga suspetsado.
Dugang pa sini nga kaangay kabisado sang mga suspek ang nahamtangan sang vault kun sa diin ang kwarta kag wala man sang mga baligya ang gin-ukay sang mga kawatan.
Suno pa kay Magbanua, ginabanta nga P116,000 nga kita sang nasambit nga balaligyaan ang nataban sang mga suspetsado.
