Nagsaka na sa 21 ang numero sang napatay sa China bangud sang paglaslas sang Typhoon Doksuri nga kilala nga si Bagyo Egay sang yari pa sa Pilipinas.
Lakip sa nagkalamatay suno sa local authorities amo ang 11 sa kapital nga Beijing kag siyam naman sa kaiping nga probinsya nga Hebei.
27 naman ang nagapabilin nga missing sa Beijing kag anum sa Hebei bangud sang mataas nga tubig-baha nga dala sang amo nga bagyo nga ginakabig isa sa pinakamalala nga nag-igu sa China sa sini nga mga tinuig.
Suno sa reports sang Chinese state media, napatay ang iban nga mga residente bangud sa mga pagbaha halin sa mga bukid nga nagapalibot sa kapital nga syudad.
Tuman ka laka ang pagbaha sa Beijing nga rason kun ngaa nagulpihan kag ginpasira gid ang subway lines kag na-kanselar kag na-delay ang flights sa duha ka airports.
Suno naman sa director sang Institute of Public and Environmental Affairs, makabig na nga “extreme” ang pag-inulan sa amo nga pungsod halin sang weekend. #
