Indi na makabalik si Jayson Castro sa nabilin nga bahin sang season matapos nakaangkon sang injury sa iya nga tuhod sa hampang sang TNT batok sa Rain or Shine sa PBA Commissioner’s Cup semifinals.
Suno kay TNT team manager Jojo Lastimosa, kinahanglan sang star guard ang 10-12 ka bulan nga pahuway.
Matandaan nga sang manugtapos na ang hampang, ginpaguwa sa court ang 38-anyos nga veteran gamit ang stretcher kag gindala sa ospital.
Kinahanglan man ang adjustments sa Tropang Giga nga subong may 2-0 lead sa best-of-seven series sa semis.
Sa 93-91 win sang Tropang Giga sang Biyernes, nagtapos si Castro nga may 13 pts, 5 rebounds, kag 5 assists. Sa Game 1 naman, naangkon sini ang team-high nga 24 pts.
Sa Governors’ Cup sang nagligad, siya man ang ginhingadlan nga Finals Most Valuable Player apisar sang iya edad.
Subong nga adlaw ang Game 3 sa Araneta Coliseum kun sa diin tinguhaan sang TNT nga makuha ang 3-0 lead agud mas makapalapit sa finals.
