Gin-aprubahan na ni President Ferdinand Marcos Jr. ang pag-ilis sang apat ka quarter nga academic calendar, sa tatlo na lamang ka term, epektibo sugod sa School Year 2026–2027.
Sa interview sang Bombo Radyo kay Leonil Salvilla, tagpababa sang Department of Education (DepEd) Schools Division of Iloilo, iya ginpaathag nga tinutuyo sang amo nga panibag-o nga sistema nga mapaayo ang kalidad sang pagtuon sang mga estudyante, pamaagi sa mas malawig kag tayuyon nga adlaw sang klase; mas hilway nga pacing sang lessons, ilabi na kun may suspensyon sang klase bangud sa bagyo ukon iba pa nga kalamidad.
Dugang pa ni Salvilla nga sa idalum sang bag-o nga pagsulundan, makaangkun sang 54 ka adlaw sang klase kag 6 tubtub 10 ka adlaw para sa enrichment block sa Term 1 , 55 ka adlaw kag 6 tubtub 10 man ka adlaw nga enrichment block para sa Term 2, kag 61 ka adlaw sa Term 3 nga may 6 ka adlaw nga enrichment block.
Ginapanan-aw nga mangin dako ini nga bulig sa mga estudyante, agud nga may yara ang mga ini sang mas tayuyun nga pag-eskwela, samtang mabuhinan man ang workload sang mga manunudlo bangud sa mas malip-ot nga grading cycle kag naka-schedule nga oras para sa pagpahuway.
Nagapadayon man nga igapatuman ang 180 minimum days sang klase sa tagsa ka school year, bilang kabahn sang reporma sa edukasyon.
