Magabiya na si President Ferdinand ‘Bongbong’ Marcos Jr. subong nga adlaw, Marso 11, para sa working visit sa Germany kag state visit sa Czech Republic.
Upod sang presidente si First Lady Liza Marcos kag iban pa nga government officials lakip sanday Senate President Juan Miguel Zubiri kag Speaker Martin Romualdez kag iban pa nga myembro sang Gabinete.
Naka-schedule si Marcos sa Berlin sa Marso 11-13 kag Prague sa Marso 13-15 base sa inisyal nga impormasyon nga ginpaguwa sang Malacañang.
Una na nga ginpasiguro sang national government nga mapirmahan ang pila ka importante nga mga kasugtanan lakip na ang maritime kag labor cooperation kadungan sang pagbyahe sang presidente sa Europa.
Suno kay Department of Foreign Affairs (DFA) Assistant Secretary Maria Elena Algabre sang Office of European Affairs, ini nga mga kasugtanan sa maritime sector cooperation kag technical and vocational education and training ang natalana nga pirmahan sa tunga sang transportation sectors sang Pilipinas kag Germany.
Sa Czech Republic naman, ginalauman nga masaksihan ang pagpirma sa joint communique kaangot sa pag-establisar sang labor consultation mechanisms para sa safe nga migration sang mga Pinoy workers amo man ang paghatag sang mataas nga proteksyon sa ila nga mga kinamatarong.
Una naman nga nagpahayag sang interes ang amo nga pungsod nga mag-hire sang dugang nga mga Pilipino para nga makasulod sa nagkalain-lain nga trabaho.
Umpisa Mayo suno sa iya, ginpasaka na sang Czech Republic ang yearly quota para sa Filipino workers halin sa 5,000 tubtub sa 10,000.
Ini nga byahe ni Marcos sa Europa ang kasunod sang iya magkasunod man nga byahe sa Canberra kag Melbourne, Australia para sa state visit kag pagtambong sa isa ka special summit kaupod sa iban nga Southeast Asian leaders.#
