Nagalaom si President Ferdinand Marcos Jr. nga mangin mabaskog pa ang kooperasyon sang mga pungsod nga miyembro sang Association of Southeast Asian Nations.
Ini matapos gin-aprubahan ang ASEAN Leaders’ Declaration on Maritime Coordination sa 48th ASEAN Summit sang nagligad nga bulan.
Sa iya speech kahapon nga adlaw, nagsiling si Marcos nga ginapakita sang deklarasyon ang tingob nga pagbuligay sang mga pungsod sang ASEAN nahanungod sa isyu nga may kaangtanan sa kadagatan.
Suno sa Presidente, ang mga diskusyon sa summit natuhoy man sa tatlo ka nagapanguna nga prayoridad kaangay sa pagpasiguro sang seguridad kag pagpabaskog sang enerhiya, food security kag pagpaayo pa sang kahimtangan sang myembro sang ASEAN.
Nagpasalamat man si Marcos sa suporta sang nagkalainlain nga mga pungsod sa kandidatura sang Pilipinas para sa isa ka puwesto sa United Nations Security Council para sa termino nga 2027–2028.
Apisar wala nakuha sang Pilipinas ang nagaisahanon nga puwesto para sa Asia-Pacific kag nakuha ini sang Kyrgyzstan, ginpabutyag sang Presidente nga padayon nga magapakig-upod ang Pilipinas sa United Nations agud mapauswag ang kalinong, padayon nga kauswagan, kag nagasunod sa layi.
