Nagapati ang Philippine Coast Guard (PCG) nga tuman ka importante ang bastante nga equipment para sa response groups agud nga mangin madasig kag mangin epektibo ang pagbulig sa tion sang kalamidad.
Sang nalubog sa tubig-baha ang norte nga bahin sang Iloilo sang nagligad nga semana bangud sang Bagyo Agaton, nagpadala ang PCG-Iloilo sang walo ka deployable response group (DRG) teams agud nga mag-assist sa rescue kag evacuation.
Sa interview sang Bombo Radyo kay PCG-Iloilo Station Commander Edison Diaz, iya ginpahayag nga may ginpadala man sa Barotac Nuevo kag Zarraga bangud may mga nasakpan nga lugar nga naglumapaw man ang tubig-baha.
May mga rubber boats na nga ginpanggamit sang amo nga tion.
Daku nga pagpanghangkat sang amo nga tion ang kabaskugon sang daludo sang tubig amo man ang makitid nga access sa iban nga areas.
Suno kay Diaz, nagamit man sang husto ang tanan nga available nga equipment apang mas maayo gid kun nangin madamo pa gid ang gamit nga ginpanghatag sa rescue groups sang PCG.
Magluwas sa PCG, ginpang-deploy man sang amo nga tion ang mga katapo sang Bureau of Fire Protection (BFP) kag Philippine National Police (PNP) agud magbulig sa mga residente nga makasaylo sa mas hilway nga mga lugar.
