PDL, ginpahayag nagpanginmatay sa BJMP-Male Dorm sa Pototan; pamilya, indi kumbinsido

Indi kumbinsido ang pamilya sang isa ka Person Deprived of Liberty (PDL) sa sulod sang Bureau of Jail Management and Penology- Male Dormitory sa Nanga, Pototan, Iloilo nga nagpanginmatay ini.

Ang PDL amo si alyas “Christian”, 33 anyos, nga napreso sang nagligad lang nga Nobyembre angot sa kaso nga may kahilabtanan sa illegal drugs.

Base sa impormasyon, isa ka nurse sa isolation facility ang nakakita sa amo nga PDL nga nagatindog apang nagapiyong ang mata.

Nahibaluan nga sa isolation facility ginbutang ang amo nga PDL bangud may indi kinaandan sa iya hulag kag aktwasyon.

Matapos makit-an sang nurse, madasig man ini nga gindala sa ospital sa Barotac Nuevo apang ginbawian gid ini sang kabuhi.

Sa interview sang Bombo Radyo kay alyas “Pau”, pakaisa sang PDL, iya ginpahayag nga kwestyonable para sa ila ang pahayag sang pamunuan sang BJMP.

Ini bangud nga wala man sang napakita nga mga ebidensya ukon mga letrato sang ila himata antes ini gindala sa ospital.

Suno kay Pau, may nakit-an man nga mga lagob sa iya lawas partikular sa kamot kag dulunggan.

Dugang ni Pau, nakasugid man sa ila si Christian nga ginapabudlayan siya sa sulod sang pasilidad.

Pahayag pa niya, may yara man sang gusto pa gid isugid si Christian apang kaangay nga nahadlok ini.

Apisar nga napaidalom na sa autopsy ang lawas kag naggwa nga positibo nga nagpanginmatay gid man ini, padayon gihapon nga nagapangita sang kaathagan ang mga himata.

Apang gintuad niya nga nakaagi naman sadto nga gintuyo sang iya pakaisa nga utason ang iya kabuhi.

Sa interview naman sang Bombo Radyo kay alyas “Fatima” nga utod ni Christian, ginkumpirma man niya nga asset ini sang pulis sadto.

Suno sa iya, ikaduha na ini nga tion nga nadakpan bangud man sa iligal nga druga apang nakagwa paagi sa plea bargaining agreement.