Kun may bata sa inyo nga balay, posible nga pamilyar ikaw sa musika nga ginagamit sa “Peppa Pig” cartoon bangud sulit-sulit nila ini nga ginalantaw.
Sa Jiangxi province sa China, isa ka pulis ang ginadayaw bangud sa iya nga paggamit sa sini nga musika agud nga makit-an ang isa ka missing nga bata nga may autism.
Isa ka adlaw, may nag-report sa pulis nga may walo ka tuig nga missing nga bata nga may apelyido nga Lu kag tuman ang kahangawa sang pamilya bangud inoras na nila ini nga ginapangita.
Sang nagresponde ang otoridad, nabudlayan sila bangud guba ang surveillance cameras sa building nga nga nahamtangan sang pamilya amo man ang yara sa elevator rason nga indi sila makasigurado kun nakaguwa ang bata ukon yara lang gihapon sa residential complex.
Anum ka oras ang ginlawig sang search kaupod sa pamilya kag property management tubtub nga nakalab-ot na sila sa kaagahon apang huyhuy gihapon ang abaga bangud indi makit-an ang ila nga ginapangita.
Sa bahin sang pulis, ginpaminsar sini sang madalom nga basi kun nag-saka ang bata sa atop sang nagbalik ini sa ila balay kag wala sang may nakit-an nga tawo.
Bangud nahibaluan sini nga may mga beses nga wala nagasabat sa kada tawag ang mga bata nga may autism, gingamit sini ang theme song sang “Peppa Pig” nga paborito gid nga lantawon sang bata.
Sang ulihi, sa dalayon nga pagpatukar sini, may nagkulas.
“By that time it was very dark and we were getting no response when we called him, so we started playing the music and heard a very faint sound,” suno sa police officer nga si Xu Haozhan.
Didto nadiskubrehan nga nagsaka gali ang bata sa rooftop, nahulog sa hagdan, kag na-trap sa pader nga daw tatlo ka metros ang kataason kag wala gid ini naga-timok-timok.
Bangud sa iya kulas, nakit-an siya sang pulis kag napasaka sa pader sa bulig sang iban nga rescuers.
Ginpaidalom sa medical check-up ang bata kag amo na lang ang kalipay sang pamilya nga wala ini sang samad ukon ginabatyag nga sakit sa lawas.
Todo-dayaw naman ang publiko bangud sa maalam kag makatalandog-balatyagon nga pamaagi sang pulis sa amo nga rescue operation.#
—via South China Morning Post
