Jaro, Iloilo City – Isa sa mga tumalagsahon nga simbolo sang debosyon kay Nuestra Señora dela Candelaria amo ang “perdon candle” nga ginasindi kun mangayo sang pabor.
Ginapatihan sang mga deboto nga milagroso ang amo nga kandila bangud nagahatag ini sang kasanag sa tunga sang kadulom.
Sa interview sang Bombo Radyo kay Reverend Father Angelo Colada, director sang Social Communication Office sang Archdiocese of Jaro, iya ginpahayag nga espesyal ang perdon candles bangud nagasimbolo ini kay Kristo bilang Kapawa sang Kalibuta
Suno kay Father Colada, human ang perdon candles sa beeswax ukon putyukan nga halin sa buyog.
Ang buyog, nahimo nga wala sang amay kag nagakahulugan nga “virgin birth” nga mapaanggid man sa pagkabun-ag ni Hesukristo nga wala sang tawhanon nga amay.
Ginakabig nga pinasahi ang perdon candles bangud wala ini ginagamit bilang ordinaryo nga kandila kag ginasindihan lang bangud ginabendisyunan ini sa simbahan.
Mahimo mabakal ang 2023 perdon candles sa Jaro Cathedral kag mga affiliated retailers umpisa Enero 30.
Magapatigayon naman sang pagbendisyon sang mga kandila sa atubang sang Jaro Cathedral pagkatapos sang Solemn Pontifical Mass sa Pebrero 2, alas otso sa aga nga amo gid ang kapiestahan ni Nuestra Señora dela Candelaria,patrona sang Western Visayas.
