ILOILO – Preparado na ang Philippine Army sa pagsiguro nga matawhay kag hilway ang eleksyon subong nga adlaw, Mayo 13.
Sa interview sang Bombo Radyo kay Lt. Col. Joel Benedict Batara, Commanding Officer sang 61st Infantry Battalion sang Philippine Army, iya ginpahayag nga may yara sang mga katapo sang militar ang naka-assign sa mga kabukiran sa norte nga bahin sang Iloilo agud nga mabantayan ang mga lugar nga masami ginakastoan sang New People’s Army (NPA).
Apang suno kay Batara, indi tanan nga mga lugar ang ila nga mabantayan sa diin kinahanglan nila sa gihapon sang bulig nagikan sa mga pumuluyo.
Importante nga ipalab-ot sang mga pumuluyo ang impormasyon nga ila nabaton sa militar agud nga maaksyunan gilayon kag ma usisa ang mga nabaton nga reports.
Nag-coordinate naman ang Philippine Army sa tagsa ka mga punong barangay sa mga kabanwahanan agud nga mapadali kag mapadasig ang pag-responde sang mga militar sa tion nga may yara sang insidente.
Liwat nga nagpanugyan si Col. Batara sa publiko nga ipabilin ang malinong kag matawhay ang adlaw sang pinili-ay.
