ILOILO – Respetuhon sang Philippine Army ang proseso kag mangin resulta sang imbestigasyon sang Philippine National Police (PNP) may kaangtanan sa pagkaulamid sang tatlo ka miyembro sang militar sa road rage incident nga nag-resulta sa kamatayon sang isa ka miyembro sang Bureau of Jail Management and Penology (BJMP) Region VI.
Ang tatlo ka mga suspek amo sanday Private First Class Bjourn Kirby Esposo, 26, residente sang Barangay Malitbog Ilaya, Bingawan, Iloilo; Staff Sergeant Nelson Sorilla, 40, residente sang Barangay Binangkilan, Santa Barbara; kag Nilo Silao alias Tata, 47, residente sang Magsaysay St., Calinog, Iloilo, miyembro sang Citizen Armed Force Geographical Unit (CAFGU).
Ang tatlo ang lunsay kabahin sang 12th Infantry Battalion nga nakabase sa Camp Carreon, Barangay Libot, Calinog, Iloilo.
Sa inisyal nga imbestigasyon sang mga pulis, nagagwa nga may pagbinaisay sa dalan, kumprontahanay nga natabo, tubtob nga naluthangan-patay sa Bangga Dama, Brgy. Bolong Oeste, Sta. Barbara ang biktima nga si Jail Senior Inspector Andrew Larupay, 51, jail warden nga assigned sa La Carlota City Jail sa Negros Occidental kag residente sang Barangay Caninguan, Lambunao.
Matandaan nga una nga nadakpan sang mga pulis si Esposo kag pagkahapon, nagsungka naman sanday Sorilla kag Silao sa bulig sang ila nga senior officers.
Padulong sa syudad sang Iloilo sanday Esposo, Sorilla, kag Silao agud magbakal kuntani sang suplay para sa battalion apang natabo ang insidente.
Sa interview sang Bombo Radyo kay Major Cenon Pancito III, spokesperson sang 3rd Infantry Division sang Philippine Army, iya ginpahayag nga nagpadala man sang team ang bahin sang militar sa Santa Barbara MPS agud nga indi na magtaas ang tensyon sa tunga sang Philippine Army kag BJMP.
Indi magpatigayon sang imbestigasyon ang militar tubtob nga indi pa matapos ang imbestigasyon sang mga pulis.
“We leave it to the investigation. We are of the interest also of finding out what really had happened. The truth. Kung anuman, rerespetuhin natin itong imbestigayon ng PNP. As much as possible, we want to be silent and gusto natin na kung ano ang lumabas sa imbestigasyon ay ‘yun ang masusunod. We will abide by that. Kung nakitaan ng paglabag [ang members ng Philippine Army], so be it,” pahayag ni Pancito.
Sa subong, samtang wala pa sang resulta ang imbestigasyon, magahatag ang Philippine Army sang legal asssistance sa mga naulamid nga militar.
Nagalaum man ang natungdan nga indi na magtaas pa ang tensyon sa tunga sang militar kag BJMP apisar sang natabo kahapon sang aga.
“We extend our condolences sa family [ni Larupay] and the BJMP family. It’s a sad day for us but we will have to face it.”
Ang tatlo ka nasambit nga katapo sang militar ang yara na subong sa paghinakop sang Sta. Barbara MPS.
