Nagpaandam ang Philippine Institute of Volcanology and Seismology (PHIVOLCS) sa posible dugang nga ash emissions kag paglupok sang Bulkan Kanlaon sa Negros Island kasunod sang “moderately explosive eruption” kahapon sang hapon, Pebrero 19.
Suno sa ahensya, delikado pa ang sitwasyon sa four-kilometer radius permanent danger zone (PDZ) bangud sa posibilidad sini nga
“short-lived explosive eruptions.”
Sa latest eruption bulletin nga gin-release 11:45 kagab-i, ginpahayag sang Phivolcs nga as of press time, wala sang nagdugang nga mga pagtay-og nga maangot sa paglupok sang bulkan kag wala man sang ground deformation.
Nagapabilin man ang status sang bulkan sa Alert Level 2 nga buot silingon yara ini sa moderate level.
Bangud posible suno sa state volcanologists ang dugang nga explosive eruptions, dapat mag-andam ang mga pumuluyo sa mga materyal nga maga-ilig halin sa bulkan kaangay sang pyroclastic density currents (PDCs), ballistic projectiles, rockfalls, volcanic gas kag iban pa nga magahalin sa bisan gamay lamang ukon “minor explosive eruptions.”
Naglupok ang bulkan eksakto 4:38 kahapon sang hapon kag naglawig sang duha ka minutos. Ginsundan ini sang 10 ka volcanic earthquakes.
Nagpahanumdom man ang ahensya sa local government units (LGUs) nga magpreparar sa pag-evacuate sa mga residente pananglitan maglala ang sitwasyon sa bulkan kag maglab-ot sa “hazardous worst-case explosive eruption.”
Nagbilin man ang Phivolcs nga mag-andam sa mainit nga lahar kun magbubo ang mamunog nga ulan nga amo ang magapahuyang sang nagtingob nga mga abo kag pyroclastic material sa naibabaw nga slopes sang bulkan.
Ginadumilian man ang mga piloto nga maglikaw sa pagpalupad sang mga aircraft malapit sa baba sang bulkan.
Sa Iloilo naman, nagpaguwa ang banwa sang San Joaquin sang ashfall advisory. Ginpaandaman ang mga residente nga maghalong bangud posible nga makalab-ot ang abo sa amo nga banwa bangud sa epekto sang northeast monsoon ukon amihan.
Matandaan nga sang nagligad nga paglupok sang amo nga bulkan sa Negros, naapektuhan sang ashfall pati ang mga kabanwahanan sa Iloilo, Antique, kag Guimaras.#
