Gin-athag sang Philippine Institute of Volcanology and Seismology (Phivolcs) nga wala sang tsunami threat sa Pilipinas kasunod sang 7.4-magnitude nga linog malapit sa West Coast sang Honshu sa Japan.
Sa abiso sang ahensya, ginpahayag nga nagluntad ang linog 3:10 sa hapon oras sa Pilipinas (4:10 sa hapon oras sa Japan).
Nahibaluan nga una na nag-isyu ang Japan Meteorological Agency sang tsunami warnings sa coastal prefectures sang Ishikawa, Niigata kag Toyama.
Na-report nga nagdangat sa tres metros ukon mga 10 ka tapak ang kataason sang balod sa Sea of Japan coast. Ginsiling man sang Japanese public broadcaster nga NHK nga posible magdangat sa lima ka metros ang kataason sang sini nga mga balod.
Mangin ang Russia ang nagpaguwa man sang tsunami warnings sa eastern cities sini nga Vladivostok kag Nakhodka.
Sa South Korea, gin-abisuhan man ang mga residente sa probinsya sang Gangwon nga maghalong kag magbakwit sa mas mataas nga mga lugar bangud sa posible pagtaas man sang tubig sa dagat.
