Physical distancing rule sang DOH sa vaccination programs, ginalapas bala sang mga pulitiko nga nagapina-picture kag nagatapik sang ‘I am vaccinated’ stickers sa vaccinees?

Kabahin sang protocol sa COVID-19 vaccination ang pagsunod sa physical distancing.

Sa interview sang Bombo Radyo kay Dr. Mary Jane Juanico, pinuno sang Infectious Disease Section sang Department of Health Region VI, iya ginpahayag nga may mga safety officers gid nga deployed agud makapahanumdom sa mga naga-administer sang bakuna kag sa mga vaccinees nga sundon ang safe distancing.

Halin sang nag-umpisa ang vaccination, may mga nagaginuwa nga laragway sang pila ka mga opisyal sang gobyerno nga nagapa-picture sa mga ginabakunahan nga mga indibidwal.

May iban man nga pulitiko nga amo pa ang nagtapik sang sticker nga ‘I AM VACCINATED’.

Apang suno naman kay Juanico, magluwas sa protocol sa physical distancing, istrikto gid nga ginapatuman sa mga nagabakuna nga mga health personnel nga magsuksok sang face mask kag face shield kag mag-sanitize sang kamot sa kada tapos atender sa tagsa ka vaccinee.

Indi man allowed ang walk-ins bangud kinahanglan nga mag-pre-register ang vaccinee.

Nahibaluan nga sa Western Visayas, masobra na sa 9,945 ka mga indibidwal ang natublukan sang bakuna sang Sinovac kag AstraZeneca.

1,229 sa sini ang naghalin sa Aklan, 100 sa Guimaras, 873 sa Antique, 3,225 sa Iloilo City, 2,227 sa Bacolod City, 1,136 sa Capiz, 1,143 sa Iloilo, kag 12 sa Negros Occidental.