ILOILO CITY – Mahimo na nga makabukas ang pila ka mga establisyemento sa syudad sang Iloilo sa tion nga ipauntat na sa Mayo 1 ang Enhanced Community Quarantine.
Sa interview sang Bombo Radyo kay Prof. Elisa Baliao, isa sa mga proponent sang lockdown exit plan, iya ginpahayag nga ang mahimo lang nga pahanugutan nga magabukas amo ang mga negosyo nga makaobserba sang physical distancing.
Ang mga parlor kag barber shops ang indi pa mapahanugutan nga mag bukas amo man ang iban pa nga mga negosyo nga indi maka obserba sang physical distancing.
Suno kay Baliao, indi man tanan nga stall sa sulod sang mall ang pahanugutan nga maka bukas.
Dugang sang natungdan, ipatuman man sa mga supermarkets ang ‘one way aisle system’ sa diin indi na mahimo makabalik-balik ang mga manugbakal kag isa lang ang mahimo nila agyan.
Gin-athag naman sang natungdan nga apisar nga bukas na ang mga establisyemento kaangay nalang sang mga department stores sa mga malls indi sa gihapon makapinagusto sulod ang mga tawo bangud nagakadapat nga may yara sila sang quarantine pass nga ipakita kag tugutan lang nga makasulod ang may yara sang importante nga balaklon.
Santo sa pahayag ni Baliao, apisar indi pa sigurado nga matapos na ang Enhanced Community Quarantine sa Mayo 1, katuyuan sang exit plan amo nga i-preparar ang mga tawo sa posible nga matabo sa tion nga tapuson na ang lockdown lakip man ang pagpabalik sa mga tawo sa ila tagsa ka mga trabaho.
Tubtob nga padayon ang pagsaka sang kaso sang COVID-19 nagakadapat nga mangin alerto kag magsunod ang mga pumuluyo sa mga ginapatuman nga pagsulundan agud malikawan nga magdamo pa ang kaso sang nasambit nga virus sa Pilipinas.
