Pabor ang pila ka pumuluyo sa syudad sang Iloilo nga dulaon na ang pagsuksok sang face shield.
Suno kay Orlando Jereza, security guard nga nagatrabaho sa syudad, mas maayo nga wala na sang face shield bangud nagakahulog man ini kun mag-commute ang isa ka tawo kag kabudlay sa nawong.
Bilang security guard, nabudlayan man siya nga kilalahon ang nagasulod sa establisyemento. “Ay boss ko na gali ato? Indi ko kilala kay naka-face shield,” pahayag ni Jereza.
“Kainit, ginabahulay ka kay nagadugang ang init,” pahayag naman ni Shalee Claveria, isa ka vendor. Mas makaginhawa siya suno sa iya kun wala na sang face shield sa ibabaw sang face mask.
Para naman kay Elvera de Lima, “okay man na nga dulaon. Sa ospital mo lang na nga makit-an ang face shield.”
Ini nga mga reaksyon ang kasunod sang pahayag sang Inter-Agency Task Force for the Management of Emerging Infectious Diseases (IATF) nga irekomendar sa gihapon kay Presidente Rodrigo Duterte ang mandatory nga pagsuksok sang face shields sa enclosed ukon indoor spaces.
Buot silingon sini, gamiton gihapon ang face shield sa ospital, eskwelahan, workplaces, commercial establishments, public transport terminals, kag simbahan.
