ILOILO – Madamo sa gihapon sang mga pribado nga supermarkets sa syudad sang Iloilo ang nagabaligya sang mga karne sang baboy halin sa Luzon.
Sa interview sang Bombo Radyo kay Dr. Tomas Forteza, Iloilo City veterenarian, iya ginpahayag nga santu sa ila monitoring, may mga pribado nga grocery stores nga nagabaligya sang mga baboy halin sa Luzon apisar ginadumilian ang importation halin sa nasambit nga lugar sa diin may mataas nga kaso sang African Swine Fever (ASF).
Gin-athag ni Forteza nga ang trabaho sang City Veterinary Office ang tubtub lang sa pag-monitor sa mga ginabaligya nga karne sang baboy, apang sa tion nga processed meat na ang mga ini, katungdanan na sang Food and Drug Administration (FDA) ang pag-regulate.
Gin-ako man ni Forteza nga indi ma-kontrol ang shipment sang baboy halin sa Luzon kag may mga pasaway nga nagapalusot sa gihapon.
Sa pihak sini, padayon ang pagpakigsapol sang Bureau Of Animal Industry kag Department of Agriculture agud indi na makasulod ang nasambit nga balatian sa Western Visayas.
Nakasugtan naman sang mga hotels, restaurant kag mga iban nga supermarkets nga mag-import sang baboy halin sa Cebu kag Mindanao.
Sa subong, ang Negros Occidental pa lang sa Western Visayas ang nakadeklarar sang total banning sang baboy halin sa Luzon.
